NEWS | "பெற்ற பிள்ளைக்கே எமனாக மாறும் பெற்றோர்கள்" - பொலிஸ் அதிகாரி குற்றச்சாட்டு

-எம்.வை.அமீர்-

முஸ்லிம்களின் புனித பெருநாள் தினமான 2016-07-06  ஆம் திகதியன்று சம்மாந்துறை பொலிஸ் பிரிவில் சட்டவிரோதமாக மோட்டர் பைசிகிள்களை ஓட்டிச்சென்றவர்கள் பொலிஸ் போக்குவரத்துப் பிரிவால் நிறுத்தப்பட்டு, அவர்கள் ஓட்டிச்சென்ற பைசிகிள்கள் பறிமுதல் செய்யப்பட்டுள்ளதாகவும், குறித்த பைசிகிள்களை ஓட்டிச்சென்றவர்களில் அநேகர் சிறுவர்கள் என்றும், அவர்களின் தாய் தந்தையர்களை அழைத்துவருமாறு கூறியுள்ளதாகவும், சம்மாந்துறை பொலிஸ் நிலைய பொறுப்பதிகாரி எச்.எம்.பிரியலால் தெரிவித்தார்.

சட்டவிரோதமான முறையில் வாகனங்களை ஓட்டிச்செல்வதனாலேயே அநேகமான வீதி விபத்துக்கள் ஏற்படுவதாகவும் விபத்துக்களை தடுப்பதற்காக பொலிசார் எவ்வாறான நடவடிக்கைகளை எடுக்கின்ற போதிலும் வாகன ஓட்டுனர்கள் சட்டவிரோதமாக வாகனங்களை செலுத்துவதனை தவிர்ப்பதனூடாகவே விபத்துக்களை தடுக்க முடியும் என்றும் தெரிவித்தார்.

தங்களது பிள்ளைகள் மீதுள்ள அன்பின் காரணமாக பெற்றோர், மோட்டர் பைசிகிள் உள்ளிட்ட வாகனங்களை தங்களது பிள்ளைகளுக்கு வழங்குவது அவர்களது பிள்ளையின் உயிருக்கும் பாதசாரிகளுக்கும் அச்சுறுத்தலாக மாறுவதாகவும் தெரிவித்தார்.

எனவே தங்களது பிள்ளைகளிடம் சட்டவிரோததாக ஓட்டுவதற்கு வாகனங்களை எதனையும் வழங்க வேண்டாம் என்று மிக வினயமாக கேட்டுக்கொள்வதாக  எச்.எம்.பிரியலால் பொதுமக்களை கேட்டுக்கொள்வதாகவும் தெரிவித்தார்.